Кои се највисоки државни органи што контролираат криминал со нафтени деривати?

Добивај вести на Viber

„Фактор“ јавно го прашува Андреја Јосифовски кои се тие органи за кои тој вчера зборуваше на прес конференција на која на „Фактор.мк“ му беше забранет пристап од страна на официјални лица на „Макпетрол“. „Фактор“ ќе го праша ОЈО дали ќе го повика Јосифовски да даде исказ за наводите за криминал во бизнисот со нафтени деривати

Кои се највисоки органи во државата кои со години наназад го контролираат криминалот во нафтениот бизнис? Ова прашање „Фактор.мк“ јавно му го поставува на Андреја Јосифовски, претседателот на Управниот одбор на „Макпетрол“ откако тој вчера на прес конференција обвини дека цитираме „ криминалот во нафтениот бизнис со години е контролиран од највисоки органи во државата„. „Фактор“ јавно го прашува Јосифовски да ги посочи директно државните органи кои се вмешани во криминал со нафтени деривати заради тоа што нашиот репортер вчера од официјални претставници на „макпетрол“ не беше пуштен да присуствува на пресконференцијата .

Јосифовски во своето излагање кажа дека неопходно е да се промени законската регулатива и тоа да се направи така што ќе се укине екстра лесното гориво или ќе се изедначи неговата акциза со таа на дизел горивото, ги пренесе „Телма“ зборовите на „Макпетрол“. Понатаму во своето излагање Јосифовски кажа дека заради тоа што разликата во акцизата е 4 наспрема 1 заради што наместо во буџетот во приватни џебови завршуваат 25 милиони евра на годишно ниво.

За жал „Фактор.мк“ не беше во можност да праша детали заради тоа што ни беше ускратено правото за присуство на прес конференцијата. 

За воља на вистината менаџментот на „Макпетрол“ во неколку годишни извештаи за работењето години наназад укажува дека постои нелојална конкуренција во бизнисот со трговија на мало на нафтени деривати. „Фактор“ во своите анализи и текстови ги пренесувал овие зборови на менаџментот и со писмени прашања доставени на официјална мејл адреса барал дообјаснувања, но досега никогаш не сме добиле одговори од долгогодишниот прв човек на „Макпетрол“.

Со цел објективно и целосно информирање на јавноста „Фактор“ истовремено со објавувањето на овој текст на оваа тема ќе побара коментари од надлежни лица во Царинската управа која е надлежна за наплата на акцизи, до Министерстово за економија кое е надлежно за регулација на нафтениот бизнис, до Државниот пазарен инспекторат кој е надлежен за контроли, а ќе побараме одговор и од скопското Основно јавно обвинителство дали ќе превземе дејствија по допрен глас откако долгогодишниот прв човек на „Макпетрол“ отворено рече дека највисоки органи во државата со години контролираат криминал со нафтени деривати.