Колкави се платите на менаџерите во „Скопски пазар„?

Добивај вести на Viber

Просечната исплатена месечна бруто плата за четворицата членови на управниот одбор е 190.000 денари месечно, а просечната плата по вработен во „Скопски пазар„ (без 4 членови на УО) е 34.350 денари. За менаџерите „Скопски пазар“ лани платил бруто околу 150.000 евра. Една третина односно 50.000 евра се бруто платата на генералниот директор Сашо Давитковски кој воедно е претседател на Управниот одбор

Бруто платите на четворица менаџери во „Скопски пазар“ за 2016 година изнесуваат 9,11 милиони денари (околу 148.000 евра), покажуваат податоците од годишниот извештај на компанијата објавен на интернет страницата на „Скопски пазар„ кој ќе се најде на следното акционерско собрание закажано на 16 јуни годинава. Менаџментот на „Скопски пазар“ во целост го почитуваше Законот за трговски друштва и ги објави платите на менаџерите пооделно. Мора да се истакне дека овој потег е за поздравување затоа што ретко кое акционерско друштво иако имаат законска обврска ги објавува платите на менаџерите односно на членовите на управните одбори.

Најголема плата, очекувано, има претседателот на Управниот одбор на „Скопски пазар“ Сашо Давитковски. Лани неговата годишна бруто плата била 3,18 милиони денари (околу 50.000 евра). Бруто платата на Сашо Давитковски, кој воедно е и генерален директор, месечно е 265.000 денари во бруто износ. Неговиот брат Тошо Давитковски, директор на ИТ сектор и член на управниот одбор лани имал годишна плата од 2,175 милиони денари (околу 35.250 евра). Тоа е месечна бруто плата во износ од 181.240 денари (3.000 евра). Нивниот зет Предраг Милисављевиќ, претседател на надзорниот одбор и директор на секторот за заеднички услуги, има годишна плата од 1,92 милиони денари (31.800 евра) односно во бруто износ од 2.650 евра месечно. Четвртиот член на управниот одбор е Звонко Стојчев, директор на секторот за пазари и за недвижности. Неговата годишна плата е 1,84 милиони денари односно 30.000 евра во бруто износ за 216 година. На месечно ниво бруто платата е 153.333 денари односно околу 2.500 евра месечно.

Вкупниот фонд за бруто плати во „Скопски пазар“ лани е 153,4 милиони денари (околу 2,5 милиони евра). Во него бруто платите на четворицата членови на управниот одбор учествуваат со 9,11 милиони денари односно со 6 отсто.

Лани „Скопски пазар“ годината ја заврши со нето добивка од 2,1 милиони денари, а приходите од продажба му изнесувале 682,9 милиони денари.