Алијансата на Албанците спремна за влада, се мерка министерство за здравство

Добивај вести на Viber

Алијансата на Албанците со своите три потписи кои му ги додели на Зоран Заев може да ја комплетира новата влада. На овој начин и формално новата влада би имала мнозинство во парламентот со 62 пратеника.

„Алијансата за Албанците се уште може да биде дел од владата, преземајќи одговорност и давајќи свој придонес за спроведување на политиките на една реформска  влада , со акцент на реализација на албанската платформа во делот кој се однесува на законот за јазикот и натамошното функционирање на СЈО.”, изјави Флакрон Беџети од Алијанса за Албанците за ТВ21.

Претходно во повеќе албански медиуми се ширеше информацијата дека Алијансата на Албанците во новата влада би сакала да го добие министерството за здравство, па веќе се разгледувале кандидати за оваа функција, а предлогот би го дал Зијадин Села.

БЕСА се уште нема донесено одлука дали ќе биде дел од новата влада, но од партијата велат дека очекуваат покана од мандатарот. Секако нивните 5 пратеника ќе гласаат за новата влада, но се уште е неизвесно дали ќе учествуваат и во извршната власт со свои претставници.

Да потсетиме Зоран Заев се уште го нема добиено мандатот од претседателот Иванов, па следните битки ќе се водат во Собранието на Република Македонија, а можни се и поконкретни чекори од досегашната опозиција кои засега не се откриваат.