Андонов: Во јануари за скоро 30 отсто зголемено домашното производство на струја

Добивај вести на Viber

На денешната прес-конференција владиниот соработник за енергетика, Виктор Андонов,  подвлече дека во месец јануари, во екот на зимата, домашното производство на електрична енергија е зголемено во однос на претходната година за 30 отсто.

„На почетокот на годината, по успешното монтирање на трансформаторот на БЛОК 3 во РЕК Битола, за прв пат после долг временски период беа ставени во функција сите домашни расположливи енергетски капацитети. Ова беше потврдено и со бројки, односно на 29 јануари 2023 година дневно производство од домашните производни капацитети изнесуваше 21.229 мегаватчасови на електрична енергија, што претставува рекордно највисоко дневно производство во последните 10 години.

Во месец јануари вкупното домашно производство на електрична енергија изнесува 561.350 мегаватчасови електрична енергија. Во споредба со истиот месец претходната година кога производството на електрична енергија изнесуваше 434.189 мегаватчасови. Зголемувањето во месец јануари изнесува 29 отсто и е во согласност со планот за 2023 година, со кој се предвидува зголемување на годишното производство на електрична енергија за 20 проценти во однос на 2022 година“, рече Андонов.

Тој додаде дека со домашното производство целосно се задоволени потребите на домаќинствата и малите потрошувачи, како и потребите за дополнителни снабдувања за училишта, прехранбена индустрија и други витални држави субјекти.