АНКЕТА: Дали Србите би војувале за Косово?
Објавено во: Балкан 13 Февруари, 2017
Mнозинството Срби сметаат дека не е оправдано да се влезе во војна со цел Косово „да остане“ во составот на Србија, покажа истражувањето на белградскиот Центар за политика во областа на безбедноста.
Од анкетираните граѓани 73% велат дека не треба да се влегува во војна со Косово, а 10% сметаат дека треба да се војува со Косово, додека 17% од испитаниците одговориле дека „не знаат“.
Според истражувањето дури и мнозинството од десничарските партии, како Српската радикална партија и Двери не се подготвени да фатат оружје в рака поради поранешната српска покраина.
Највоинствени се младите меѓу 15 и 29 години, од кои 15% би тргнале во војна за Косово, покажува анкетата, изработена со поддршка на норвешкото Министерство за надворешни работи од 26 декември до 14 јануари на примерок од 1.403 полнолетни државјани на Србија.
Што се однесува до членовите на политичките партии, 70,6% од анекетираните од Српската прогресивна партија се убедени дека не е оправдано да се војува со Косово, кај Демократската партија тој процент е 86, 5%, а истиот став го имаат и 70,2% од приврзаниците на Социјалистичката партија на Србија.
За Косово не би војувале ниту 57,5% од анекетираните од Двери, 87% од приврзаниците на Либерално-демократската партија и 50 отсто од Српската радикална партија.
Косово прогласи независност во февруари 2008 година и досега е признато од околу 110 држави во светот. Србија не ја признава неговата независност и го смета за своја јужна покраина.