Апанажа ќе земаат 38 поранешни пратеници
Објавено во: Македонија 10 Јуни, 2017
Собраниската Комисија за прашања на изборите и именувањата ги прифати барањата за апанажа на 38 поранешни пратеници.
На следната седница која ќе се одржи во вторник ќе го разгледува барањето од поранешната пратеничка, Љубица Буралиева за отпремнина до пензионирање.
Барања за апанажи поднеле и новите вицепремиери Рамиз Мерко и Хазби Лика, како и Лилјана Поповска, која повторно стана пратеник по испразнувањето место на листата на ДОМ. Тројцата ќе добијат апанажи за периодот од престанокот на функцијата пратеник до назначувањето на новите функции.
Според Законот за плати и надоместоци на избрани и именувани лица од 2014 година, поранешните пратеници земаат апанажа во зависност од бројот на месеците во кои биле дел од Собранието, но парите ќе ги добиваат најмногу една година.
Сумата што ќе ја добиваат 38-те пратеници е околу 1.000 евра месечно. Апанажата е во висина на платата на пратениците, а ќе ја исплаќа Собранието. Поранешните пратеници ќе имаат право на надоместок и за време на годишниот одмор.