Добивај вести на Viber
Од Левица обвинија дека ВМРО-ДПМНЕ и СДСМ ги напаѓаат.
Сметаат дека тоа е поради тоа што Левица е на страната на народот и рејтингот на партијата расте.
„Изминатиов период се води жестока црна кампања против Левица, каде СДС манипулира дека сме во коалиција со ДПМНЕ и ДУИ, и обратно - ДПМНЕ манипулира дека сме во коалиција со СДС и ДУИ. Манипулациите се засилија кога советниците на Левица, како единствена опозиција во општините која не е поткуплива, гласаше против општинските буџети на ДПМНЕ - во кои единствена развојна компонента е зголемување на парите за партиски вработувања“, велат од Левица.
Додаваат дека дури и во одредени општини, како Неготино, Кочани и Гевгелија, советниците од ДПМНЕ и СДС сложно ги изгласаа буџетите, кои се на штета на граѓаните.
„Широката коалиција јасно е дека се обидува да ја оцрни Левица, која многу пати во минатото била единствена опозиција која алармира за погубните процеси на власта, во која учество земаше и опозицијата - како примерот со внесувањето етничка припадност во лични карти. Левица е во ЕДИНСТВЕНА коалиција со НАРОДОТ, но јасно ни е дека искрено и чесно делување е непоимливо за ваквите клиентилистички партии, кои егзистираат врз корупција, закани, уцени и партиски вработувања. Јасно е дека оваа паника кај СДС-ДУИ-ДПМНЕ е последица на последните анкети, според кои Левица со наглиот раст и поддршка од граѓаните станува ТРЕТА партија и официјално пред ДУИ“, објаснуваат од Левица.
Од партијата велат дека ќе им ги расипат сметките во наредната влада.