Апелациониот суд ја одби жалбата како неоснована - продолжува стечајот на Еуростандард банка

Добивај вести на Viber

Апелациониот суд Скопје ја одбил жалбата од Еуростандард банка, против отворањето на стечајната постапка врз оваа банка.

Според Апелациониот суд Скопје, оваа жалба се одбива како неоснована. Отфрлањето на жалбата вчера беше објавено во Централниот регистар, а Одлуката била донесена на трети септември.

Ова значи дека се потврдува Решението на Основниот граѓански суд, кој на 14 август ја отвори стечајната постапка, откако два дена претходно, на 12 август, НБМ и ја одзеде дозволата за работа на банката на бознисменот Трифун Костовски. 

„Со Решение ТСЖ-817/20 од 03.09.2020 година на Апелационен Суд Скопје, жалбата на должникот Еуростандард Банка АД Скопје, изјавена преку полномошник Славко Секулов адвокат од Скопје, се одбива како неоснована. Решението на Основен граѓански суд Скопје СТ-123/20 од 14.08.2020 година, се потврдува“, стои во објавата од Централниот регистар. 

Првото рочиште за стечајот на Еуростандард банка е закажано за осми октомври.

За стечаен управник на банката беше именуван Душко Тодевски.

Во меѓувреме, штедачите кои имаат влог поголем од 30 илјади евра, кој не можеше да биде наплатен преку Фондот за осигурување на депозити, своите заштеди ќе ги бараат од стечајната маса на банката.

Но, дел од нив се разочарани, бидејќи, како што велат, им било кажано дека од спечалените пари кои ги штеделе во банката, ќе можат да си подигнат само една четвртина, или 24,5 отсто. 

Н.Н.Ф.