АРГИР ВЛЕЗЕ ВО УПРАВНИОТ ОДБОР НА НЛБ ГРУПА: Избран на првата седница на Надзорен

Добивај вести на Viber

Антонио Аргир, поранешниот генерален директор на НЛБ Банка во Скопје и официјално стана нов член на Управниот одбор на НЛБ Групацијата во Љубљана. Банката ја извести вчера Словенечката берза дека се одржал состанок на Надзорниот одбор, прв годинава, на кој се назначени тројца нови членови на Управата, а меѓу нив е и Аргир. 

За нови членови на Управниот одбор на НЛБ беа именувани Хедвика Усеник, Антонио Аргир и Андреј Ласиќ. Сите тие доаѓаат од НЛБ или НЛБ Групацијата, имаат долгогодишно искуство и искуство во создавање докажана вредност.

Антонио Аргир целата своја кариера ја гради во НЛБ Банка Скопје. Во банката се вработува во 1999 година како кредитен референт за корпоративни клиенти, долгорочни и инвестициски заеми, а подоцна поминува неколку години во Деловна мрежа како координатор, раководител на експозитура и Директор на Секторот Деловна мрежа. Во 2015 година станува член, а половина година подоцна и претседател на Управниот одбор на НЛБ Банка Скопје. Тој се приклучи на раководството на НЛБ во Љубљана на 1 јануари 2022 година, а кормилото на НЛБ Банка Скопје му го предаде на Бранко Грегановиќ. Аргир беше член на Македонската банкарска асоцијација, а од 2018 година ја извршуваше функцијата потпретседател на Стопанската комора на Северна Македонија. Под раководство на Антонио Аргир, НЛБ Банка Скопје забележа исклучителен раст во сите сегменти од своето работење и значително зголемување на профитабилноста на Банката, а цената на акцијата на НЛБ Банка Скопје се зголеми за пет пати. Денес, НЛБ Банка Скопје е угледна и стабилна финансиска институција и лидер во иновациите и дигитализацијата на банкарските производи и услуги на пазарот.

 „Со сите тројца колеги многу добро се познаваме, долги години работевме и дишевме заедно, а ги знаат и нашите клиенти, нашите партнери и целиот тим на вработени во НЛБ Групацијата. Убеден сум дека тие се најдобриот избор и со гордост, радост и самодоверба очекувам да се приклучат на Управниот одбор на НЛБ, изјави Блаж Бродњак, извршен директор на НЛБ групацијата.

Новите членови на Управниот одбор имаат петгодишен мандат откако ќе добијат согласност од Централната банката на Словенија. Дотогаш ќе ги извршуваат функциите извршни помошници на Управниот одбор.