БАНКАРИТЕ ДЕНЕСКА ТРЕБА ДА ПРЕСЕЧАТ - за кого ќе има одложување на кредитните рати и после први октомври
Објавено во: Финансии 01 Септември, 2020
Банкарите денеска треба да пресечат каков модел на помош за граѓаните кои имаат кредити кон банкарските институции ќе се прифати, односно за кого ќе има одложување на кредитните рати и после први октомври, дознава Фактор.
Според банкарски кругови, деновиве банкарите интензивно работат на конечно формулирање на моделот на тоа како ќе се одлагаат ратите за кредитите и после први октомври, кога завршува претходно определениот рок од страна на властите.
Нашите извори велат дека денеска банкарите ќе ги имаат последните усогласувања, по што финалниот модел и би можел да биде објавен во јавноста.
Нашите сознанија говорат дека и од први октмври ќе може да се одложува плаќањето на кредитните рати, но таква можност нема да им се даде на сите граѓани.
Односно, оние со подлабок џеб веќе нема да бидат поштедени од обврската да се раздолжуваат кон банките за своите кредити, што значи дека нема да можат да бираат дали ќе плаќаат или не, туку ќе мора да го прават тоа, додека, пак, за оние посиромашните, а особено за оние погодени од корона кризата, повторно ќе има шанса за ослободување од плаќање на кредитните рати.
„Всушност, ќе има критериуми, според кои ќе се одредува кои граѓани ќе можат да ги одложат и после први октомври своите рати, а кои тоа нема да можат да го направат“, велат наши извори од деловните банки во земјава.
Од Народната банка неодамна изјавија дека постојано ги следат состојбите.
„Подготвени сме соодветно да ги приспособуваме политиките и навремено да реагираме во согласност со нашите надлежности. Во тек се анализи, врз основа на кои наскоро ќе се заземе став по однос на ова прашање, водејќи сметка и за потребите на граѓаните и за стабилноста на банкарскиот систем“, беше последниот став на НБМ.
Н.Н.Ф.