Биткоинот е еден од најголемите потрошувачи на струја: Троши како цела Аргентина
Објавено во: Економија 12 Февруари, 2021
Биткоинот троши повеќе електрична енергија на годишно ниво отколку цела Аргентина, покажа анализата на Универзитетот во Кембриџ.
Копањето на оваа криптовалута бара многу електрична енергија, бидејќи вклучува работа на огромен број моќни компјутери. Истражувачите од Кембриџ велат дека биткоинот троши 121,36 терават часови електрична енергија годишно и дека има малку шанси оваа количина да се намали, освен ако вредноста на биткоинот не започне драстично да паѓа.
Критичарите велат дека компании како Тесла, кои го градат својот имиџ на зачувување на животната средина, всушност работат против околината со потези што ги влечат за да го зајакнат биткоинот.
Биткоин достигна нов рекорд оваа недела кога надмина 48.000 долари, а денес може да се купи за 47.000 американски долари. Најавата на Тесла дека компанијата вложила1,5 милијарди во биткоини и дека наскоро планира да започне да ги прифаќа како валута за плаќање на електрични возила доведе до значаен скок на цената минатата недела.