Бизнисмените потиснати од масовното нелегално прислушување

Добивај вести на Viber

Според информациите кои ги откри истрагата „Таргет“ на СЈО голем број на бизнисмени биле ставени под посебни мерки на следење и прислушување без легално обезбедени процедури што е директна закана врз економските слободи, а можностите за злоупотреби се огромни, оценува дел од бизнис фелата во Македонија.

Со ваквата пракса на прислушување, бизнисот е ставен во немилосрдна положба, за 24 Вести коментира бизнисменот Венко Глигоров и не ја исклучува можноста информациите од прислушуваните разговори да се користеле за местење на тендери, уценување и обезбедување на послушност од стопанственците.

Мендерес Кучи од стопанската комора на Северозапдна Македонија, вели дека престанале да разговараат по телефон, уште по објавата на бомбите. 

Мегу звучните имиња се најде и банкарот Хари Костов кој реагираше до јавноста. 

„Загрижува фактот дека слушањето на моите приватни и службени разговори е правено противзаконски и за сметка на нечии лични интереси. При тоа, не се работи за Хари Костов како физичко лице, туку и како претставник на деловна институција, која според законот располага со деловни тајни, а со чие прислушување некој ги злоупотребил за стекнување нелојална конкурентска предност или  за свои лични интереси“, вели Хари Костов од Комерцијална банка.

Во аферата „Таргет“ СЈО осомничи десет вработени во УБК кои прислушувале  околу 4300 лица во периодот од 2008 до 2015 година без судска наредба. Во три системи за следење на комуникациите во сопственост на УБК осомничените сами внесувале броеви кои биле „таргети“ на прислушувањето, па дури и сами ги слушале снимените разговори.