ЧЕЛИК ЗА ЕВРОПА: Ги затвораат вратите за беспомошните и примаат терористи
Објавено во: Балкан 29 Март, 2017
Турскиот министер за храна, земјоделство и сточарство, Фарук Челик вели дека Турција продолжува да се грижи за милиони бегалци, додека Европа ги затвора нејзините врати за нив и обезбедува место за терористи.
„Тие ги затвораат вратите за беспомошни лица и наместо тоа ги отвораат за терористи“ - рече Челик.
Тој се обрати синоќа на албанско-турскиот бизнис форум во Тирана, и кажа дека Турција освен за своите 80 милиони граѓани, се грижи и за други над три милиони бегалци кои бараат азил.
Тој посочи дека додека Турција ги отвора границите, таканаречените цивилизирани земји од Европската унија ги затвораат вратите за луѓето кои бараат азил.
И турскиот претседател, Реџеп Таип Ердоган претходно се закани дека ќе ги пушти бегалците кон Европа затоа што ЕУ не ги исполни ветувањата за ослободување од визи за турските граѓани. Се заостри реториката меѓу Турција и Европа, откако во Германија и Холандија, Ердоган не можеше да одржи митинзи пред референдумот. Тој овие земји ги нарече нацисти фашисти.