Дачиќ на државите кои го признаа Косово им посакува да им се случи Каталонија?
Објавено во: Балкан 30 Октомври, 2017
Српскиот шеф на дипломатијата, Ивица Дачиќ, вели денеска дека Косово и Каталонија ги поврзува тоа што и во едната и во другата територија се случи едностраната сецесија, без дијалог со земјата од која се отцепија. Според него, Каталонија не го следи примерот на поранешна Југославија, туку на Косово.
„Тие со следат Косово бидејќи имаа еднострани акти. И некои републики на поранешна Југославија водеа таква политика. Краток е патот од поддршка на единството на земјата до брзо признавање на новосоздадената реалност, како што беше со Словенија, Хрватска, да не го споменувам Косово“- рече Дачиќ.
Вели дека потоа развојот на ситуацијата не зависи од меѓународното право, туку од комбинација на меѓународните околности.
„Ми се чини сфатија дека проблемот и ним ќе им се удри од глава исто така. Ние не ликуваме поради тоа, но сепак би сакал на земјите што го признаа Косово да им се случи истото тоа, па ние да одлучуваме дали тоа е според меѓународното право“- кажа Дачиќ.
Како што рече, сега многумина размислуваат дали беа исправни актите за Косово.