Донев за уставните измени: Македонија има желба да стане членка на ЕУ, треба да ги почитува принципите врз кои се темели Унијата

Добивај вести на Viber

Бугарскиот технички премиер Галаб Донев вели дека Бугарија не сака да се меша во внатрешните работи на Македонија. 

Кажа дека уставните измени и носење други закони, секоја држава треба да ги решава во согласност со внатрешната практика. 

„Не е точна интерпретацијата дека ние сме сакале да учествуваме во тој процес“, изјави бугарскиот технички премиер Галаб Донев во интервју за бТВ.

Како што пренесе БТА, тој потсети дека земјава презела ангажман да ги вклучи Бугарите во Уставот заедно со сите останати наброени народи, со што, како што кажа, ќе им бидат гарантирани нивните права. Според Донев, оваа обврска не е само кон Бугарија, туку кон сите земји членки на ЕУ.

„Затоа што Република Северна Македонија, потпишувајќи го договорот за присоединување и отпочнување преговори со ЕУ, го потпиша тој договор со сите земји членки“, рече Донев.

На прашањето дали Бугарија треба да стави повторно вето на Македонија за членство во ЕУ, Донев рече дека тоа не е најправилното решение, туку треба да се бара дијалог. 

„Бидејќи Република Северна Македонија има желба да стане членка на ЕУ, треба да ги почитува принципите врз кои се темели Унијата“, изјави Донев.

Шефот на бугарската дипломатија Николај Милков вчера на брифинг за новинари појаснил дека „процесот на промена на Уставот секако е внатрешна работа на Република Северна Македонија“, но, притоа нагласил дека „Бугарија нема да прифати никаква формулација со која на македонските Бугари ќе им се додели статус што на кој било начин е различен од оној од другите уставно признати делови од народите во Република Северна Македонија“.

Претходно, Милков рече дека сакаат да се вклучат во процесот на уставните измени. Од македонското Министерство за надворешни работи(МНР) рекоа дека тоа не е возможно за странски граѓани и институции, затоа што тоа е внатрешно прашање на Македонија. Македонскиот претседател Стево Пендаровски реагираше дека барањето е скандалозно.