Државата да прогласи елементарна непогода - Националната мрежа на земјоделци има осум барања

Добивај вести на Viber

Националната мрежа на земјоделци бара државата да прогласи елементарна непогода.

Високите температури и дождови се  причина за појава на болести и штети на земјоделските култури.

Ѓорѓи Каракашев од Националната мрежа на земјоделци вели дека климатските промени ја направија штетата на производите. Кажа дека годинава ќе има слаби приноси на грозјето, а со слаб квалитет сe и приносите на пченица и јачмен, а истото се очекува за кочанскиот ориз и ресенското јаболко.

Националната мрежа на земјоделци до Владата достави осум барања. Побараа да бидат ослободени од воден надоместок, усогласување на цените, производни цени на сите земјоделски култури, а кочанскиот ориз да се прогласи за стратешка култура. Барањата ги доставиле пред десеттина дена, а одговор засега немаат добиено.

„Се нанесоа катастрофални штети од поплави, болести, а имаше и присуство на град. Веднаш потоа имавме енормно високи температури, што дополнително ги отежнаа условите за производство. Сега сме сведоци на сериозни оштетувања. Кај некој култури има забележано од 50 до 100 проценти. Сега земјоделците се наоѓаат во една многу деликатна ситуација. Буквално не можат ни да ја поминат сезоната“, вели Каракашев.

Земјоделците се жалат дека секоја следна година е полоша.