Државата започна финансиски да ги помага ВИК Македонија и Дура Аутомотив

Добивај вести на Viber

Дура Аутомотив добила 25,07 милиони денари пред еден месец од Дирекцијата за технолошки индустриски развојни зони, додека на ВИК Македонија во зоната Алинци во Прилеп и биле исплатени 27,8 милиони денари од Владата во јуни како дел од договорите за државна помош во услови на неповолни глобални економски текови предизвикани од корна кризата.

ВИК Македонија е фабрика за производство на електрични апарати наменети за употреба во домаќинствата, а планира првична инвестиција од 15 милиони евра. Дура Аутомотив заедно со уште двете фабрики за производство на софистицирани автомобилски делови, кои дополнително ги гради, планира инвестициски циклус од 48 милиони евра 

Двете компании се странски инвестиции кои започнаа да работат изминатиот период и веќе започнаа да ја добиваат државната помош што им следува. Како што е познато, инвеститорите во развојните индустриски зони се ослободени од повеќе јавни давачки, добиваат комунални ослободувања и долгорочен закуп на градежно земјиште под ниски цени, субвенции за плати и помош за изградба на капацитетите.

Актуелната власт претходно донесе одлука да се покрене постапка за декласификација на класифицираните информации и договори за доделување на државна помош, склучени помеѓу Македонија и странски инвеститори, со што правилата за доделување на државна помош би биле исти, односно не би постоело дискреционо право некому да се даде повеќе, а на друг помалку. Сепак, во некои договори и понатаму бројките за финансиска помош се сокриени.

Странските инвеститори во Македонија во последно време се меѓу најуспешните и по приход и по добивка, започнувајќи од Џонсон Мети, Ван Хол, Гентерм, Кромберг и Шуберт, Џојсон Сејфти Системс, АРЦ Аутомотив и АМфенол Технолоџис во Топ-50 најдобри во 2019.

А.К.