ДУИ бара да се преземат мерки против оние кои одбиваа наредба од министерот на МВР
Објавено во: Македонија 28 Април, 2017
Во седиштето на ДУИ во Мала Речица заседаваше централното претседателство на партијата на Али Ахмети.
Причина за свикување на партискиот врв беше крвавиот четврток, а меѓу нападнатите беше и новиот собраниски претседател кој доаѓа од редовите на ДУИ.
По завршувањето на претседателството портпаролот на таа партија Бујар Османи во име на Демократската унија за интеграција го честита новиот избор на собрански претседател.
„ДУИ го осуди насилното однесување врз избраните пратеници од страна на толпата и постави прашање за улогата на институциите во одржување на редот и мирот и оттука побара преземање на соодветни мерки против оние кои потфрлија во спроведување на нивните надлежности вклучувајќи ги и официјалните лица во командниот синџир на МВР кои што одбиваа наредби од министерот за внатрешни работи“, рече Османи.
Од ДУИ побараа сите страни вклучувајќи го и ВМРО ДПМНЕ да придонесат во надминување на оваа состојба и силно и недвосмислено да ги осудат актите на насилство и крвопролевање во Собранието.