Ердоган вели дека на Германија треба да и се суди за помагање на терористи
Објавено во: Балкан 04 Март, 2017
Турскиот претседател, Реџеп Таип Ердоган ги обвини Германците дека нивната земја е вистинско прибежиште за терористите.
Жестоките критики на Ердоган кон Германија доаѓаат откако германските власти одлучија да откажат три собири за поддршка на Ердоган и референдумот за воведување на претседателски систем во Турција.„Спречија моите министри за правда и економија да говорат на собирите. Требаше и јас да се обратам на видео бимовите“- изјави Ердоган.
Тој ја обвини Германија дека ги толерира собирите на Курдите чии што организации Турција ги смета за терористички и порача дека на Германија треба да ѝ се суди поради тоа што ги прифаќа и им помага на терористите.
Реагираа од германското Министерство за надворешни работи од каде што изјавите на Ердоган ги оценија како апсурдни.
Во Германија се проценува дека живеат три милиони Турци, коишто се бројно гласачко тело за турските власти.
Германската канцеларка Ангела Меркел која што се наоѓа во посета на Тунис, веднаш ги отфрли таквите обвинувања на Ердоган. Таа не ја пропушти приликата да упати остри критики на сметка на слободата на медиумите во Турција.