ФАЈНЕНШАЛ ТАЈМС АНАЛИЗИРА: Дали новата методологија е потенцијална борба околу земјите од Западен Балкан?
Објавено во: Македонија, Балкан 06 Февруари, 2020
Новата методологија e потенцијална борба околу земјите од Западен Балкан.
Во текстот со наслов „Брисел им отвора пат на земјите членки да ги запрат преговорите за проширување на ЕУ“, Фајненшал тајмс (ФТ) пишува дека предлог планот, наведен во документот, е покренат од спорната одлука на Франција да ги спречи Македонија и Албанија да отворат преговори за членство во ЕУ.
Предлогот на Европската комисија за проширување на ЕУ претставува основа за потенцијална борба меѓу земјите членки на Унијата околу тоа дали Скопје и Тирана ќе добијат зелено светло за претпристапни преговори, а се отвора и прашањето како ќе влијае врз Србија и Црна Гора, кои порано ги започнаа преговорите.
Колегиумот на комесари на ЕУ вчера ја усвои новата методологија на процесот за пристапување во Европската унија.
Акцентот е ставен на кредибилност, предвидливост, динамичност и засилено политичко раководење. Документот предвидува запирање на преговорите, дури и нивно враќање назад ако некоја од кандидатките стагнира или назадува во реформите.