ФАКТОР СО ДЕТАЛИ ЗА ГОЛЕМАТА ТРАГЕДИЈА КАЈ БЛАЦЕ: Во Лепенец се трага по цело семејство, спасен е само 21-годишниот син

Добивај вести на Viber

Потрагата по возилото кое по сообраќајната несреќа паднало во реката Лепенец се уште трае. Се бараат уште тројца патници кои биле во возилото. Фактор од свои извори дознава дека станува збор за цело семејство од соседно Косово.

-Восилото не е пронајдено се уште. Водите на Лепенец се брзи и длабоки. Во возилото биле цело семејство од Косово, татко, мајка и двајца синови. Извлечен е 21-годишниот, додека по помладиот, 16-годишниот се уште се трага, иско како и по родителите, брифираат изворите на Фактор.

По несреќата, 21-годишното момче итно е префрлено во ГОБ „8 Септември“, а директорот на болницата, д-р Христијан Костов, за Фактор изјави дека се чекаат негови роднини од Косово да го преземат.

-Пациентот има екскориации, односно иповршински повреди по кожата и изгребаници, како и набиеници по телото. Во моментов чека во Ургентниот Центар на ГОБ „8 Септември“ да го земат блиски роднини. Тој е косовски државјанин, вели директорот Костов за Фактор.

Инаку, како што соопштија претходно од ЦУК, потрагата се одвива во исклучително тешки услови бидејќи реката е длабока и многу брза, а со себе носи и предмети кои се опасност за нуркачите.

По настраданите трага тим од нуркачи.

Според информациите од Министерството за внатрешни работи, возилото завршило во Лепенец откако автомобил „фолксваген туран“ со македонски регистарски ознаки претекнувал колона автомобили на патот од Скопје кон граничниот премин „Блаце“. Во моментот кога стигнал паралелно до автомобил „бмв“ со косовски регистарски таблички кој се движел во истата колона, двете возила се доближиле и странично се удриле, по што косовскиот автомобил со четворица патници излетал од патот и се превртел во реката Лепенец.

Анита Буховски