Фирмите што зедоа Ковид 1 кредити можат да здивнат, враќањето ќе го одложат за уште три месеци

Добивај вести на Viber

Развојната банка на својата веб-страница објави јавен повик, со кој се нуди можност на компаниите-корисници на кредити од првата бескаматна кредитна линија Ковид 1, да поднесат барање за продолжување на грејс-периодот и рокот на отплата за дополнителни три месеци.

Јавниот повик, информираат од Владата, ќе трае во наредните седум дена, односно заклучно со 14 октомври, и може да се види на линкот: https://www.mbdp.com.mk/mk/vesti/668-javen-povik-do-kreditokorisnicite-na-kovid1. 

Со него практично почна имплементацијата на четвртиот пакет економски мерки за справување со последиците од пандемијата со ковид-19.

„Зголемувањето на грејс периодот за отплата на кредитите од Ковид 1, ќе им обезбеди дополнителна ликвидност на компаниите во четвртиот, последен квартал од 2020 годна, за полесно справување со социо-економската криза“, порачуваат од Владата.

Потсетуваат дека бескаматната кредитна линија Ковид 1 во вредност од 5,5 милиони евра, беше наменета за најпогодените дејности на почетокот на ковид кризата, односно за угостителската, транспортната и туристичката дејност.

Од оваа линија беа одобрени 737 кредитни апликации на компании кои вработуваат вкупно 6.509 лица. Од вкупниот број на компании 77 отсто се микро претријатија, 21отсто мали фирми, додека околу 2 отсто од корисниците се компании со средна големина.

„Со оваа мерка, преку Развојната банка на постоечките корисници на кредитни линии од оваа банка, ќе им бидe обезбедена можноста за продолжување на грејс периодот и периодот за отплата на кредитот за три месеци, пред да започнат со исплата на ануитетите од земените кредити. Четвртиот пакет мерки има за цел да обезбеди одржливост на домашните економски дејности и да се заштитат што е можно поголем број работни места за граѓаните...“, велат од Владата.