(ФОТО) Гори во Тетово, граѓаните се гушат во чад
Објавено во: Македонија 19 Август, 2017
Гори депонијата на влезот во Тетово кај железничката пруга од утрово.
Чадот се гледа уште од првата патарина на автопатот Скопје-Тетово.
Засега не се знаат точните причини како дошло до пожарот.
На неколкупати од депонијата се издигнува густ, црн чад, а екипи на тетовската Територијална противпожарна единица интервенираат на запалениот смет. Граѓаните се жалат дека несподносливата смрдеа и чадот освен близу депонијата сега се чувствува насекаде низ градот.
Градоначалничката на општина Тетово, Теута Арифи вели дека наскоро ќе знаат дали ќе можат да се справат со пожарот или ќе бараат помош.
Проблемот со дивата депонија кај претоварната станица трае подолго време. Од општината на неколкупати најавуваа дека овој простор ќе се расчисти од смет и оти веќе нема да се користи како претоварна станица.
Арифи пред десеттина денови најави дека за оваа намена со ребалансот на буџетот се планирани 12 милиони денари и дека по расчистувањето целиот простор ќе биде дезинфициран. Потоа теренот согласно урбанистичките планови ќе се користи за изградба на станбени и индустриски објекти.