(ФОТО) РАМА И НЕГОВИОТ СТИЛ: За Трамп чевли, за Хан патики
Објавено во: Балкан 21 Септември, 2017
Албанскиот премиер Еди Рама и во САД се прошета со патики.
На средбата со европските челници Хан и Могерини, се појави во „неговиот“ познат стил додека пак на дипломатскиот прием кај американскиот претседател Трамп реши патиките да ги замени со чевли.
Премиерот Заев исто така беше дел од средбата на лидерите од Западен Балкан со еврокомесарот Хан и на вечерата со високата претставничка за надворешна политика на ЕУ, Могерини во седиштето на делегацијата на ЕУ при ОН.
Од Хан премиерот добил поддршка да продолжи да работи демократски на почнатите реформи.
“Продолжете да работите демократски на започнатите реформи. Тоа што ќе го постигнете е важно за песпективите на вашата држава и за целиот регион“ порачал еврокомесарот Хан.
Тој ги оценил иницијативите на Владата на Македонија за добрососедство и регионална соработка како корисни во процесот на интегрирање на целиот Западен Балкан во евро-атлантските интеграции.
Премиерот Заев соопшти дека Владата на Република Македонија е активно фокусирана на реализација на реформскиот План 3-6-9 и на потребните активности за остварување на стратешките евро-атлантски цели на државата.
-Ја заокружуваме првата фаза според предвидениот рок, до крајот на септември. Го имаме Извештајот на експертот од ЕУ, Прибе и неговите сугестии ќе бидат земени предвид во вториот дел од Планот на којшто веќе работиме. Нашата цел е да создадеме услови за квалитетен живот на граѓаните на Македонија и за евро-атлантските интеграции. Работиме напорно, инклузивно, вклучувајки ги граѓаните, граѓанските организации, политичките партии, ги зацврстуваме постоечките пријателства и градиме нови со државите од соседството и на меѓународен план. Со право очекуваме исчекор во европските интеграции на есен, преку тргање на условеноста на препораката, а потоа и датум за преговори. Паралелно сметаме дека ги исполнуваме потребните услови и за интеграцијата во НАТО, рече премиерот Заев.
На средбата се разговараше и за отворените можности за напредок на Македонија на економски план, преку зголемениот интерес на домашните и странските инвеститори и придонесот што ќе имаат отворени евро-атлантски перспективи за економскиот развој на Република Македонија.
По едночасовната средба на премиерот Заев со еврокомесарот Хан, претседателот на Владата на Република Македонија беше на вечерата што за лидерите на Западен Балкан ја организираше високата преставничка за надворешна и безбедносна политика, Федерика Могерини, во седиштето на делегацијата на ЕУ при ОН.