(ФОТО-ВИДЕО) БЕЛГРАД НА НОЗЕ: Шести ден протести ја тресат Србија
Објавено во: Балкан 08 Април, 2017
Повеќе од 10 000 граѓани протестираат во близина на зградата на српскиот парламент против изборот на премиерот Александар Вучиќ за шеф на државата, пренесуваат медиумите од соседна Србија.
Ова е шести по ред ден на незадоволство на улиците откако политичарот ги освои претседателските избори уште во првиот круг минатата недела.
За него гласале речиси 55% од гласачите.
Луѓето прво се собраа во центарот на Белград, приклучувајќи им се на полицајци и војници, кои протестираа поради ниските плати и лошите услови за работа во секторот.
Србите извикуваа „Вучиќ е крадец“, а потоа се упатија кон главната полициска станица.
Составен од претежно млади луѓе протестниот марш го обвини Вучиќ за фалсификување на изборите, заплашување, поткуп и контрола врз медиумите за време на изборната кампања.
Граѓаните побараа промена на Државната изборна комисија, уредниците на националните телевизии и претседателот на парламентот.
Новоизбраниот претседател не изгледа загрижен од демонстрациите и изјавил: „Јас сум им благодарен на граѓаните за силната поддршка што ме охрабрува само да работам повеќе. Видно е дека протестите се мирни и демократски и сè ќе биде во ред“.
Владини функционери тврдат дека демонстрациите се организирани од опозициските лидери, кои пак го негираат тоа.
Демонстрантите носат и плакати со натписи: „Долу диктатурата“, „Нема да бидеме евтина работна сила“, „Доста терор од страна на власта“ .