Граѓаните со петиција бараат оставка од членовите на ДИК поради бонусите
Објавено во: Македонија 07 Декември, 2017
Повеќе од 1.600 луѓе досега се потпишале на он-лајн петицијата со која се бара оставка од членовите на Државната изборна комисија (ДИК) откако во јавноста беше објавено дека земале високи бонуси.
„Бараме оставка на деветте членови на Државната изборна комисија (ДИК) поради неетичко однесување и кршење на „Принципите за работа“ објавени на веб-страницата на ДИК кои меѓу другото гласат: „Постојано вршиме самоевалуирање затоа што сакаме постојано да ја унапредуваме нашата работа и секој нареден изборен циклус да биде подобар од претходниот. Притоа ја зголемуваме ефикасноста, ја спроведуваме работата со помалку напор, и ја зголемуваме ефективноста со што ги намалуваме трошоците за својата работа“ – се наведува во петицијата.
Во јавноста деновиве излегоа информации дека платата на членовите на Државната изборна комисија (ДИК) се движи помеѓу 60.000 и 70.000 денари и дека во изминатите 18 месеци, во три наврати, си доделиле вкупно 12 надоместоци.
Информации за бонусите даде и американскиот амбасадор Џес Бејли.Граѓаните кои ја потпишале петицијата бараат оставка, враќање на парите, но и кривична одговорност.