Грција се вжештува - Македонија е неприфатлив термин, меѓународната заедница ја разгали новата влада

Добивај вести на Viber

Политичката атмосфера во Грција се вжештува и се погласни се критиките на тамошната опозиција која бара заострување на позициите во преговорите за името каде терминот Македонија е неприфатлив дури и во сложена комбинација. 

При дебатата во грчкиот парламент е побарано владиното мнозинство да се изјасни и да ги каже позициите во преговорите за името. Спорно за грчките опозиционери е тоа што коалициониот партнер во владата на Ципрас и министер за одбрана Панос Каменос има различен став за прашањето за името од шефот на дипломатијата Никос Коѕиас.

За Каменос – терминот Македонија е неприфатлив. Но, наместо конкретен одговор, Ципрас рече дека кога ќе дојде време да се донесат одлуки, парламентот ќе бил известен. 

„Би сакал да ви потенцирам дека кога ќе дојде, ако дојде тој момент за да донесеме критични одлуки да не се грижите,  ќе се погрижиме да има едно пошироко поклопување на ставовите за позициите на земјата. Повторувам за едно критично национално прашање потребно е пошироко поклопување на ставовите кое ќе се однесува на сите партии од парламентот.“ - изјави Алексис Ципрас, премиер на Грција.

Шефот на грчката дипломатија во парламентот откри дека во следните неколку дена ќе се сретне со посредникот во спорот со името Метју Нимиц, кој како што кажа ќе му ги пренесе впечатоците од средбите во Скопје. Коѕиас подоцна за грчките медиуми повторно го спомена иредентизмот и ја обвини Македонија дека била разгалена од меѓународниот фактор.

„Во понеделник ќе одам на преговори и би било голема грешка од моја страна да се произнесам на еден јавен настап, неколку дена претходно. Бев како што знаете, 2 пати во Скопје, разговаравме за прашањето, беа неподготвени. Дојдоа во Грција, пак неподготвени. Разгалени се од меѓународниот фактор.“- изјави Никос Коѕиас – Министер за надворешни работи на Грција.

Пред две недели Нимиц беше во посета на Македонија, тогаш по средбите со државниот врв, посредникот во спорот со името изјави дека не дошол со нов предлог, туку дека разговарал за концептите за градење добрососедство, а на новата македонска влада, и порача решавањето на спорот за името да го стави на врвот на агендата.

По средбите во Скопје, се очекуваше Нимиц да се сретне со Коѕиас во Атина, но средбата беше презакажана заради учеството на шефот на грчката дипломатија Никос Коѕиас во решавањето на кипарското прашање.

Извор: ТВ 24