Груби: Сцените од 27 април никогаш да не се повторат
Објавено во: Македонија 01 Декември, 2017
Се уште се чека на потврдување на барањето за изрекување мерка притвор на шесте пратеници од опозициската ВМРО-ДПМНЕ Крсто Мукоски, Јохан Тарчуловски, Љубен Арнаудов, Жаклина Пешевска, Сашо Василевски и Љупчо Димовски, кои се осомничени во групата според која ЈОРМ на 27 април извршила терористичко загрозување на уставниот поредок и безбедноста.
Откако Собранието на пленарна седница гласаше да им се одземе имунитетот отворен е патот судот да одлучи дали ќе го прифати барањето за притвор. Без присуство на опозицијата, на седницата Артан Груби од ДУИ зеде збор.
„27 април беше уште еден тежок ден за сликата на државата, и за кредибилитетот на сите нас. Тие сцени никогаш веќе да не се повторат. За тоа сите ние носиме одговорност и сме еднакви пред законот и правото“, потенцираше Груби.
Јавното обвинителство сомничи вкупно 36 лица од кои дваесетина се веќе пронајдени и сите кои беа изведени пред суд потоа добија притвор во истражниот затвор.