Гувернерката за Еуростандард: Сопствениците знаеја за одлуката, комунициравме и со инвеститорот

Добивај вести на Viber

Јасно им укажувавме на сопствениците на сериозноста на состојбата во која се наоѓаше банката и инсистиравме на итна докапитализација, потенцирајќи дека ако не се случи докапитализацијата, Народната банка ќе нема друг избор освен преземање на најстрогата мерка – укинување на дозволата за основање и работење на банката, вели во интервју за Вечер, гувернерката Анита Ангеловска Бежоска. Таа тврди дека сопствениците имале обврска за докапитализација во првата половина од годинава и покрај уплатата од 11 милиони евра минатата година, за да се одржат минималните законски барања.

Вели дека нема потешка одлука од одлуката за затворање на банка. 

„За жал, сопствениците не го обезбедија потребниот капитал за првата половина од оваа година, ниту обезбедија издржано и реално решение за пренесување на сопственоста на инвеститор. Неисполнувањето на обврската за докапитализација заедно со поголемите загуби доведе до несолвентност на банката. Велам издржано и реално решение, бидејќи со оглед на финансиската состојба на Банката, издржано решение значеше и инвеститор кој би извршил брза докапитализација во обем и со динамика кои би овозможиле нејзина одржливост. А секако, за некој да биде сопственик на банка треба да мине и низ целосно документиран процес на оцена на соодветноста за акционер во согласност со критериумите дефинирани во Законот за банките, вели гувернерката.

Додава дека вложиле максимални напори, во согласност со законските прописи, да се изнајде поповолно решение, вклучително и преку интензивна комуникација со сопствениците, но и комуникација со потенцијалниот инвеститор посочен од нив. 

„На крајот мораше да се преземе ваквиот чекор, како што бара и Законот за банките. Впрочем, тој е и законска обврска, со чие почитување се заштитува банкарскиот систем, но клучно – се заштитуваат и депонентите и доверителите на конкретната банка, вели Ангеловска Бежоска.