Хашкиот суд бара 60 илјади евра од Ратко Младиќ!

Добивај вести на Viber

Поранешниот командант на Армијата на босанските Срби, генерал Ратко Младиќ на Судот за воени злосторства во поранешна Југославија во Хаг, треба да му плати 60.000 евра на име трошоци за одбраната, пишува српскиот весник „Данас“.

Како што пишува весникот, Младиќ уште во јуни 2011 година го известил Трибуналот дека нема средства за да ги плати трошоците за одбраната, но истрагата на Судот утврдила дека тој поседува семејна куќа чија вредност ја надминува висината на средствата за неговите основни потреби и за потребите на луѓето со кои живее, а  и Младиќ и неговата сопруга Босиљка секој месец редовно примале пензии и имале заштеди во банка.

По направената проценка на вредоста на имотот и на редовните месечни примања, Трибуналот констарирал дека Младиќ можел и требало сам да ја финансира својата одбрана пред Хашкиот суд.

Трибуналот сега бара Младиќ да плати 60.000 евра за одбраната, додека останата сума од трошоците за оваа намена ќе ги покрие Судот, пишува „Данас“.

Младиќ се товари за геноцид, кршење на законите и обичаите при војување и за злосторства против човештвото, извршени за време на Војната во Босна и Херцеговина од 1992 до 1995 година. Тој беше уапсен во Србија во мај 2011 година.