И ФЕД ГИ ЗГОЛЕМИ КАМАТНИТЕ СТАПКИ - после Европа, и Пауел повлече нов потег со цел да ја заузда инфлацијата

Добивај вести на Viber

На состанокот во средата, ФЕД ги зголеми клучните каматни стапки за дополнителни 0,75 процентни поени, втор месец по ред, на опсег од 2,25 до 2,50 отсто. Зголемувањето на каматните стапки за вкупно 1,5 отсто за два месеци претставува најагресивно заострување на монетарната политика од 1990-тите. На овој начин ФЕД се обидува да ја потисне инфлацијата, која моментално е на највисоко ниво во последниве повеќе од 40 години, над 9 отсто, пишува See Biz.

Инвеститорите, пак, беа охрабрени од изјавата на претседателот на ФЕД Џероми Пауел на прес-конференцијата дека понатамошните потези на централната банка ќе зависат од идните економски показатели и дека се очекува забавување на затегнувањето на монетарната политика.

„По дополнително заострување на монетарната политика, во наредниот период веројатно ќе биде соодветно да се забави тоа темпо додека не ги анализираме вкупните ефекти од прилагодувањето на нашата политика врз економијата и инфлацијата“, рече Пауел.

Тој рече дека растот на економијата забавува, но дека не е во рецесија, на што, меѓу другото, укажува и силниот пазар на труд.