„Илинден“ од Тирана бараат Темелко да се ослободи
Објавено во: Македонија 27 Септември, 2017
Како и претходно така и сега за случајот со Едмонд Темелко се јавуваат македонски здруженија од Албанија кои бараат ослободување на градоначалникот на Пустец, инаку обвините од СЈО.
Македонско друштво „Илинден“ -Тирана и Македонско друштво „Илинден“ - oгранок Голо Брдо најостро го осудуваат притворот од триесет дена за Едмонд Темелко, гадоначалник на општина Пустец и претседател на Македонска Алијанса за европска интеграција во Република Албанија.
„Македонците во Република Албанија се згрозени од приведувањето на Едмонд Темелко и бараат итно ослободување од гонење и извинување за повреда на честа и неговиот углед и на Македонците во Република Албанија, се наведува во соопштението во кое се додава дека приведувањето на Темелко, според нив, е антимакедонско и со долгорочни последици по положбата и правата на Македонците во Република Албанија.
Претходно, Кривичниот совет на Основниот суд Скопје 1 Скопје го прифати барањето на СЈО и му определи на Темелко мерка 30-дневен притвор. Темелко е обвинет во случајот „Титаник“ за изборни нерегуларности на локалните избори во 2013 година. Тој вчера беше спроведен од полициска станица во притвор кој е побаран бидејќи ја минувал границата со албански документи и не се јавувал редовно во судот.