ИМА НЕДВИЖЕН ИМОТ НА СВОЕ ИМЕ, ДОСЕГА Е НЕОСУДУВАН... - од Врховен суд ги изнесоа причините зошто не треба затворски притвор за таткото на Вања
Објавено во: Македонија 28 Април, 2024
Немало потреба од затворски притвор за Александар Ѓорчевски, таткото на Вања, бидејќи обезбедувањето на неговото присуство може да се постигне и со примена на поблага мерка, а и законот налага траењето на притворот да биде сведен на најкратко нужно време. Ова се причините поради кои Врховниот суд ја уважи жалбата на Ѓорчевски и му определи домашен притвор, јави телевизија Телма.
„Ваквата одлука Врховниот суд на Република Северна Македонија ја донесе имајки ги предвид и личните прилики на осомничениот кој што е со познат и утврден идентитет, со постојано и познато место на живеење, поседува недвижен имот на свое име, досега е неосудуван и против него не се води постапка за друго кривично дело, а особено околноста што определените мерки за обезбедување на присуство на обвинетиот се похумани од претходно определената мерка притвор и со нив ќе бидат постигнати истите цели и ефекти како и со мерката притвор,“, соопштиле од Врховен суд.
Ѓорчевски од декември беше во притвор во Шутка, бидејќи е осомничен дека помагал при грабнувањето на неговата ќерка. Врховниот суд во својата одлука наведува и дека оправдана била одлука на Апелација дека Ѓорчевски може да се даде во бегство и дека тој може да ја попречува истрагата и да го повтори кривичното дело и затоа му е изречен домашен притвор. Највисокиот суд му определи и мерки на претпазливост на Ѓорчевски, односно забрана за издавање на нов пасош и преминување на границата со лична карта.