Инспекторите во Македонија стануваат старци
Објавено во: Економија 30 Април, 2020
На почетокот од оваа година имало вкупно 818 инспектори во 25 инспекциски служби, тврди резимето на Инспекцискиот совет, кој утврдил големо намалување на бројот на професионалци од оваа фела во последните две години поради пензионирање.
Вкупниот број на оние кои вршеле инспекциски надзор е намален за 156 инспектори за две години, односно за 16 отсто во државата. Во Државниот пазарен инспекторат се пензионирале дури 95 инспектори за две години.
- Главните причини за тоа лежат во многу неповолната старосна структура на инспекторите во инспекциските служби и несоодветното планирање и управување со човечките ресурси. Неповолната старосна структура е особено изразена кај гоемите инспекциски служби, велат од Инспекцискиот совет.
Најголем број на инспектори пред пензионирање има во Државниот трудов инспекторат, каде што дури 32,1 отсто од надзорниците се постари од 60 години. Алармантна е и ситуацијата во здравствениот и санитарен инспеторат со 23,2 проценти „кандидати“ за новопечени пензионери, како и во инспекторатите за земјоделство и за просвета, кои имаат над 20 отсто инспектори постари од 60 години.
- Добро е што Владата не ги донесе најавените законски измени за пензионирање, барем засега, бидејќи така ќе изгубевме уште повеќе инспектори. Кај нас има многу од нив кој ја користат актуелната законска можност и не одат во пензија кога ќе наполнат 64, односно 62 години, а добро е тоа, бидејќи ни се потребни, велат за „Фактор“ инспектори кои сакаа да останат анонимни во оваа ситуација.
Порачуваат дека сепак инспекторатите интерно, како и државата, треба да посветат повеќе внимание на создавање на нови стручни кадри и да ја зацврстат повеќе релевантноста на овие институции. Власта на крајот од минатата година подготвуваше предлог-закон за укинување на можноста лицата по 64 односно 62 годишна возраст да имаат право да работат дополни две до три години.
А.К.