Изземање на судијката од „Тврдина“ - бара СЈО

Добивај вести на Viber

Специјалното јавно обвинителство достави барање за изземање на судијката Лидија Петровска за првото обвинение, во кое кривично се гонат седум вработени во УБК заедно со екс началникот, Горан Грујовски. 

Со цел  непристрасно судење, СЈО бара изземање на судијката од „бомбите“.

„Постојат околности кои предизвикуваат сомневање во нејзината непристрасност во донесување на одлука, од причини што истата судијка се јавува во содржината на јавно објавените незаконски прислушувани разговори“ - велат од СЈО.                                       

Петровска беше спомената во „бомбите“ објавени од опозицијата, од нејзината колешка Софија Лаличиќ која на тогашниот директор на УБК, Сашо Мијалков му објаснува како Петровска и подарувала сваровски накит на претседателката на кривичниот суд, Лидија Неделкова. 

СЈО ги врати доказите во судот за случајот бидејќи смета дека на витални документи и правилници потребни за работење на УБК не треба да им се одземе ознаката државна тајна и доверливо поради штетата што може да се нанесе. Петровска бараше декласификација затоа што оценила дека некласифицирани не може да бидат користени од судските служби. Од СЈО се со став дека судот како и секоја друга институција мора да има вработени кои може да работат со класифицирани документи.