Јанкуловска: Заев и Јанева без докази ги почнаа предметите, така и ќе ги завршат

Добивај вести на Viber

Екс министерката за внатрешни работи Гордана Јанкуловска го нападна СЈО како институција која извршува партиски задачи за СДСМ и дека сите досегашни постапки ги базирале на кафански муабети, алудирајќи на „бомбите“ со прислушкувани разговори каде таа беше една од најчестите.

- Катица Јанева и нејзините соработници можат да отворат и милион случаи, без аргументи  на база на кафански муабети, на база на шпекулации, на база на посакувани сценарија кои тие очигледно ги креираат на дневна основа, но најважно е како ќе ги затворат. Јас ќе кажам како што си ги отворија без докази така и ќе си ги затворат без докази. Затоа што не може вие со повторување на една ноторна лага за која се свесни дури и малите деца дека едноставно не држи вода, да ја направите вистина.

Поранешната прва „полицајка“ оценува дека сите напори на опозицијата за нејзино оцрнување на дале со плод.

- Впрочем целата оваа активност и на Зоран Заев и на Катица Јанева, и на чадорот што ги штити, координира и опструира во изминативе две ипол години очигледно не вроди со плод. Иако некој се запраша па зарем е можно да се потрошат толку пари, ресурси и енергија, знаеме ние колкави буџети на располагање има СЈО и со какви фондови оперира СДСМ, и да дојдете до една ситуација после една таква условно речено жестоко негативна, неаргументирана кампања, вие повторно да бидете губитник на изборите. Затоа што губитник на овие избори не е само Зоран Заев и СДСМ, губитник е и СЈО бидејќи тие беа истурениот играч во кампањата на СДСМ. Но губитник е и оној што проценил дека тие се личностите односно структурата која ќе ја спроведе агендата која ја замислиле за Република Македонија. Очигледно и ВМРО-ДПМНЕ како партија и поединците од ВМРО-ДПМНЕ, но и целиот македонски народ покажа дека луѓето се свесни и знаат да прават сопствена проценка и да дадат сопствен суд за нештата што се случуваат. И не им треба СОРОС со неговите марионети да им кажува која е лагата која е вистината.

Јанкуловска засега нема план да се врати во високата политика. Инаку таа дури 13 пати беше помилувана од страна на претседателот Иванов кој потоа ја укина аболицијата, а СЈО против неа води бројни истраги, како и судски процеси.