ЈOВАНОВИЌ ЗА СТРУЈАТА: За луѓе што живеат со 40 денари на ден тоа се огромни пари

Добивај вести на Viber

Поскапувањето на струјата е директен удар врз сиромашните граѓани, 100.000 живеат со 40 денари на ден. 

Oва го тврди Бранимир Јовановиќ, поранешен советник во Министерството за финансии кој предупредува дека поскапувањето на струја е директен удар врз 755.000 сиромашни граѓани. 

Вели дека објаснувањето што беше кажано од Регулаторна нему му е прилично несмасно. 

„Практично не можам да поверувам дека може да се покачи цена на струја како дозволуваат сметките, методологијата. А, законите дозволуваат да се покачи цена на струја во ваква криза, но не дозволуваат да се намали. Мене ми е тоа практично неприфатливо објаснување. И мислам дека едноставно е недолично објаснување во ваква ситуација, и мора да се изнајде решение. Се говори во јавноста дека ова поскапување ќе значи и 100 до 200 денари повисока сметка месечно. За луѓе што живеат со 40 денари на ден тоа се огромни пари. Така што ова поскапување ќе значи удирање по најсиромашните“, изјави Јовановиќ во емисијата „Бизнис поенти“.

„Италија ги суспендираше сметките за струја, гас, вода и ѓубре на 2 месеци. Белгија им даде на домаќинствата до 100 евра за сметки за струја и 75 евра за сметки за гас. Словенија ја намали цената на струјата за домаќинствата и малите фирми за 20%. Кипар ја намали цената на струјата за 10% на 3 месеци. Македонија ја зголемува цената на струјата за 7,4%, а има највисока сиромаштија и невработеност во Европа“, наведува Јовановиќ.

АД МЕПСО по реакциите на јавноста за одлуката за поскапување на струјата излезе со соопштение во кое вели дека претпријатието побарало зголемување на цената заради тоа што се планира инвестициски циклус од, како што велат од таму, 100 милиони евра.