Каевски: Блокада на европскиот пат ќе значи 11 загубени години во изолација, загубени 10 милијарди евра од европските фондови

Добивај вести на Viber

Блокадата на европскиот пат прескапо ќе ги чини земјата и народот, вели  Дарко Каевски, пратеник од СДСМ и портпарол. 

Рече дека антиевропското делување на Христијан Мицкоски и ВМРО-ДПМНЕ е на директна штета на граѓаните и државата. 

„Обидот за блокада на членството во ЕУ е обид за загрозување на македонската иднина. Блокада на европскиот пат ќе значи 11 загубени години во изолација, загубени 10 милијарди евра од европските фондови и неизвесна иднина. Прескапа цена е тоа за нас како држава, но и како народ и тоа не смее да се случи“, рече пратеникот. 

Додава дека се одвоивме од Хрватска и заостанавме 17 години во чекалната.

„Ако се одвоиме од Албанија, Црна Гора и Србија, никој не гарантира дали некогаш ќе биде можно да станеме земја членка на ЕУ“, вели тој.

Каевски додава дека имаме историска шанса, сериозна поддршка од ЕУ и САД за продолжување на европскиот пат.

„Преговарачката рамка е усвоена од сите 27 земји членки и таа обезбедува и гарантира целосна заштита на македонскиот јазик и идентитет. Не може државата да биде заложник на кариерата на антиевропски политичари. СДСМ ќе направи сѐ за да државата да оди напред, ќе направиме сѐ за граѓаните да живеат во европска држава, со европски животен стандард“, изјави пратеникот. 

ВМРО-ДПМНЕ и натаму е против уставните измени. 

Заменикот помошник државен секретар на САД, Габриел Ескобар вели дека не е во Македонија да врши тортура врз некого. Тој вака ја прокоментира изјавата на претседателот на ВМРО-ДПМНЕ, Христијан Мицкоски дека власта барала од меѓународните пријатели да се притисне опозицијата да го смени ставот за уставните измени.