Како Макпетрол ги зголеми приходите за 17,8 милиони евра?
Објавено во: Економија 04 Август, 2017
Макпетрол за само шест месеци од годинава бележи подобрени финансиски резултати со раст на приходите од неверојатни 17,8 милиони евра. Главната причина за големиот раст се должи пред се на растот на цените на нафтените деривати, но и на поголемата продажба на производи на Макпетрол како на домашниот така и на странскиот пазар каде учеството во вкупните приходи иако не зазема драстичен процент сепак, бележи позитивен раст од 1,4 милиони евра.
- Во овој период МАКПЕТРОЛ АД Скопје оствари вкупен приход во износ од 8,58 милијарди денари кој е поголем од минатогодишниот за 1,1 милијарди денари. Ваквото зголемување на приходите се должи на ефектот од зголемувањето на цените на дериватите во однос на истиот период од минатата година како и на зголемените набавки на деривати со вклучена акциза. Во истиот период остварени се вкупни расходи во висина од 8,46 милијарди денари што преставува зголемување во однос на минатата година за 1,1 милијарди денари или 15 и.п. во што повторно најголем удел има зголемувањето на цените на дериватите и набавките со вклучена акциза во овој период, стои во образложението кое Макпетрол го објави на Македонска берза покрај финансискиот извештај за првата половина од годинава.
Како што може да забележите Макпетрол во првото полугодие од годинава има вкупни приходи од 138,4 милиони евра или за 17,8 милиони евра повеќе во однос на истиот период лани. Макпетрол за првите шест месеци од 2017 исто така доста и трошел, пред се на набавка на трговски стоки кои се зголемени за околу 18 милиони евра. Трошоците за плати за вработените се речиси идентични како и лани и за нијанса се зголемени, па вкупно изнесуваат 7,2 милиони евра.
Макпетрол ги намалил и расходите за камати за околу 40%, а за околу 2,8 милиони евра е намалена и кредитната задолженост. Крајната добивка на Макпетрол изнесува 1,8 милиони евра со што за нијанса е подобрена профитната стапка во однос на истиот период во 2016 година.
Автор: Христијан Станоевиќ