ЌЕ ПОЛАГААТ ЛИ СРЕДНОШКОЛЦИТЕ ДРЖАВНА МАТУРА: Неделава очекуваат да заврши штрајкот на ДИЦ

Добивај вести на Viber

Точно една недела трае штрајкот на вработените во Државниот испитен центар кој е задолжен за спроведување на државната матура, а овие денови средношколците на кои им е потребен овој исклучително важен документ за продолжување на образованието на некој од универзитетите, се надеваат дека неизвесноста ќе заврши. Оние со кои разговараше Фактор се крајно разочарани и сметаат дека најголема штета секогаш трпат токму учениците.

-Секоја година се соочуваме со некаков проблем, ова навистина е неиздржливо. Ништо не видовме од средношколските денови, пандемија, штрајкови наставниците за плати, сега штрајк на вработените во ДИЦ. Секогаш најтешкиот товар го носиме ние. Полуписмени не оставија, па само уште ова ни недостига, да не полагаме државна матура. Мене конкретно државната матура ми треба за да ја продолжам едукацијата во Утрехт, Холандија, но секој еден што сака да студира, макар и на УКИМ, овој документ е потребен, не можеме да се запишеме со училишната диплома, односно со уверението дека сме завршиле средно училиште. Кај нас секогаш се користи ваков момент, да се направи притисок за да го добијат тоа што го сакаат, вели Андреј С. средношколец од Тетово.

Истовремено, и претседателот на Сојузот на средношколци, Лука Павиќевиќ цени дека мора брзо да се најде решение, за да навреме течат сите рокови околу испитите кои практично треба да почнат на 27 мај, нагласувајќи дека зголемувањето на платите на вработените во ДИЦ и нема да му нанесе голем товар на буџетот.

- Иако Сојузот сè уште нема официјално дискутирано по ова прашање, јас ќе кажам дека лично имам целосни симпатии за барањата на вработените во Државниот испитен центар. Износите на платите што ги споделија со јавноста се скандалозни и недозволиви. Понатаму, станува збор за навистина мал број на вработени, што значи дека зголемувањето на платите нема сериозно да ја обремени државата. Исто така, во прегледот на ОЕЦД за образованието во земјава е наведено дека: „Државниот испитен центар (ДИЦ) е препознатлив во регионот поради иновативната поставеност и интегритет“. Не треба државната матура да биде доведена во прашање бидејќи таа ќе им наштети најмногу на матурантите, но и на целиот систем. Токму затоа апелирам надлежните институции – МОН и Министерството за финансии, да ги прифатат барањата на вработените и заеднички да изнајдат начин мирно и навремено да го решат штрајкот вели во изјавата за Фактор, Павиќевиќ.

Инаку, синдикатот на Државниот испитен центар соопшти дека ги стопира сите процеси што се во нивна надлежност, па освен спроведувањето на претстојната државна матура, најверојатно нема да ги подготвуваат и меѓународните тестирања, обуката и испитот за директори на училишта, приправничките испити за сите наставници. Бараат повисоки плати, бидејќи поголем дел од нив, а вработени се вкупно 29, го земаат минималецот од 20.100 денари.

Анита Буховски