ЌЕ СЕ ПОДЕЛИ ЛИ ГРАДОТ: Има собрание во Шпанија, а вода и струја добива од Каталонија

Добивај вести на Viber

Жителите на малиот град Сан Рафаел дел Рио, на границата меѓу Каталонија и Валенсија, се плашат дека конфликтот меѓу Мадрид и Барселона би можел да ги подели.

Поголемиот дел од Сан Рафаел, вклучувајќи го градското собрание, се наоѓа во регионот Валенсија, кој не планира да ја напушти Шпанија, но со Каталонија ги дели системот за наводнување, патиштата, електричната мрежа, па дури и повикувачкиот телефонски префикс.

„Луѓето се нервозни и исплашени, бидејќи се чувствуваат како во слободен пад“- објаснува 47-годишната Гвадалупе Еспиноза од каталонската страна на реката која тече низ градот со нешто повеќе од 500 жители, како природна граница меѓу двете покраини, објави Асошиејтед прес.

Градоначалникот Доминго Хинер вели дека конфликтот меѓу каталонските и шпанските власти, поради референдумот за отцепување на Каталонија кој Мадрид го забрани, нема да има големо влијание врз тој град. Тој додава дека соседите од двете страни на реката Сенија мирно живеат заедно.

Едните се идентификуваат како Каталонци, а другите како Шпанци, но немири меѓу луѓето нема. 

„Валенсија и Каталонија се разликуваат, но иако постои граница, градот е единствен“- истакнува 20-годишниот Нацари Реверте.

Шпанскиот Уставен суд нареди привремена суспензија на седницата на каталонскиот парламент. 

Еврокомесарот за економски и финансиски прашања Пјер Московиси изјави дека доколку Каталонија прогласи независност и се отцепи од Шпанија, таа повеќе нема да биде членка на Европската унија.