Ќе се воведат две нови државни награди Блаже Конески и Ремзи Несими

Добивај вести на Viber

Од Владата по одржаната 151-ва седница, соопштуваат дека има предлог за воведување на две нови државни награди. 

Владата го разгледа и утврди и текстот на Предлог на закон за изменување и дополнување на Законот државните награди, со што предлага воведување две нови државни награди.
 
„На Иницијатива од Советот за македонски јазик, како што соопшти предлагачот, Министерството за култура, се предлага да се востанови нова државна награда за оддавање признание за високи стручни и научни достигнувања од областа на македонскиот јазик во земјава и во странство, којашто се предлага да го носи името на Блаже Конески - основач на современата македонска наука за јазикот, лингвист, литературен и културен историчар, поет, прозаист и преведувач. По Иницијатива на Институтот за духовно и културно наследство на Албанците, како што соопшти Министерството за култура, се предлага да се востанови уште една нова државна награда, за оддавање признание за високи стручни и научни достигнувања од областа на албанскиот јазик и  албанологијата во земјава, којашто, се предлага да го носи името на Ремзи Несими - лингвист, просветен работник и учесник на Конгресот за правописот на албанскиот јазик во 1972 година“, соопштија од Владата. 

Конески е еден од најзначајните протагонисти во процесот на кодификацијата на македонскиот стандарден јазик.  Неговите дела се преведени на голем број јазици. Тој е истакнат прозаист, есеист, публицист, литературен историчар, полиглот, препејувач од многу јазици на делата на низа поети како Његош, Неруда, Мајаковски и други.

Во земјава веќе има книжевни награди кои се доделуваат во чест на познати македонски поети како Анте Попоски, Кочо Рацин, Ацо Караманов.