Кога ќе почне процедурата за избор на нов јавен обвинител?

Добивај вести на Viber

Како што информираше денеска на прес-конференција, портпаролот на Владата, Миле Бошњаковски, Владата на наредна седница на 22 август на дневен ред ќе стави заклучок со кој ќе му се наложи на Собранието да распише оглас за избор на нов Републички јавен обвинител. 

Откако ќе биде распишан конкурсот, тој ќе биде отворен 15 дена. По ова, сите биографии на кандидатите ќе бидат испратени до Советот на јавни обвинители кој ќе има 15 дена рок за да даде позитивно или негативно мислење за кандидатите. Овие мислења Советот ќе ги испрати до Владата која на наредната седница откако ќе ги добие мислењата ќе треба да избере еден кандидат кој од Советот добил позитивно мислење. Биографијата на избраниот кандидат се испраќа до Собранието со препорака тој да биде избран за нов Републички јавен обвинител кое со 61 глас „за“ ќе треба да го одобри изборот на кандидатот.

„Ќе се бира професионалец, односно личност од професијата со дигнитет и достоинство кој ќе го врати угледот на позицијата јавен обвинител, ќе го почитува законот и Уставот и ќе постапува еднакво, непристрасно и одговорно во делење на правдата и воедно ќе ја врати довербата на граѓаните во правосудните институции“- вели Бошњаковски. 

Тој е категоричен дека ќе се запазат сите законски регулативи при изборот на новиот јавен обвинител.

Конкретниот рок кога ќе се избере јавен обвинител не се знае, затоа што според членот 8а од Изборниот законик, според кој од распишување на изборите до конституирање на општинските совети, не може да се започне постапка за вработување на нови лица или постапка за престанок на работен однос во државни и јавни институции, а започнатите постапки се ставаат во мирување.

Собранието вчера го разреши Марко Зврлевски од функцијата јавен обвинител на Република Македонија.

Обвинителката Лилјана Спасовска ќе го менува Зврлевски се до изборот на новиот вршител на функцијата. 

Мандатот на државниот јавен обвинител е шест години со право на повторно именување.