Уште една земја се подготвува за воведување на еврото.
Премиерот на Хрватска, Андреј Пленковиќ, изјави дека се залага за воведување на еврото по што би можело да следува официјално барање за влез на Хрватска во Европскиот механизам на девизниот курс (ERM II).
Хрватската народна банка подготви стратегија за воведување на еврото, која содржи анализа на придобивките и можните ризици од пристапувањето во еврозоната.
Стратегијата ќе биде објавена на крајот на месец октомври, пишува „Вечерни лист“.
Последен пат одлука за влез на некоја земја во Европскиот механизам на девизниот курс е донесена во 2005 година, и тоа за Словачка. Овој механизам е предворје низ кое кандидатот мора да помине пред да добие зелено светло за влез во еврозоната.
Секоја земја што ќе стане членка на Европската Унија законски мора да го воведе еврото како официјална валута, но не постои рок во кој мора да го направи тоа. Исто така, преземањето на заедничката европска валута не е еднострана одлука.
Доколку Хрватска побара влез во Европскиот механизам на девизниот курс, односно ја убеди Европската комисија дека го контролира јавниот долг и дека ќе го спушти кон границата од 60% во разумен рок, се смета дека еврото би можело да стане официјална валута во оваа земја најрано во 2022 или 2023 година.
За соседна Бугарија иако имаше предвидувања дека до 2013 година ќе го воведе еврото, сепак тоа досега не се случи.