Комерцијална банка не се откажува од поделба на дивиденда: Ќе ја подели кога ќе престане мерката на Народната банка
Објавено во: Економија 10 Март, 2021
Комерцијална банка АД Скопје не се откажува од поделбата на дивидендата од ланската добивка, но ќе ја испочитува Народната банка која привремено забрани банките да делат дивиденди годинава. Од Комерцијална банка од каде веќе имаше одлука на Надзорен одбор за поделба на дивиденда, денеска соопштуваат дека направиле измени за да се усогласат со оваа одлука на регулаторот. Парите ќе стојат како задржана добивка и ќе се распределат кога ќе има можност за тоа.
„Комерцијална банка АД Скопје обрнува внимание дека и со измените на Одлуките, Надзорниот одбор на Банката останува со предлогот дивидендата да изнесува 600 денари по акција и дека измените во Предлог - Одлуките за исплата на дивидендата претставуваат одложување од привремен карактер. Износот на дивидендата останува како задржана добивка расположлива за распределба на акционерите до денот кога за Банката ќе престане да важи ограничувањето за распределбата и исплатата на дивиденда на акционерите.