Комисијата за дискриминација упати препорака: Клубот „Иван Михајлов“ да го промени името
Објавено во: Македонија 14 Октомври, 2022
Комисијата за спречување и заштита од дискриминација (КСЗД) по увидот предводен од поранешната пратеничка Весна Бендевска што го направи во бугарскиот културен клуб „Иван Михајлов“, му препорача на Министерството за правда дека здружението во Битола треба да ги отстрани сите спорни елементи во името, статутот и програмата.
Во препораката утврдени се и рокови по кои треба да се постапи, според она што денеска го изјави Бендевска. На 4-ти август годинава, КСЗД изврши увид во клубот од Битола. Бендевска е известителка за овој предмет, во кој се постапува по претставка добиена од здружение на граѓани.
- Ова се однесува на елементите кои предизвикуваат вознемирување врз национална, етничка основа, што е детално опишано во нашето мислење, во рок од 45 дена. Се препорачува здружението да ги отстрани содржин на својата Фејсбук страница кои предизвикуваат вознемирување во форма на давање и поттикување на инструкции за вознемирување поврзани со ликот, делото на личноста Иван Михајлов во најкус можен рок, но не подолг од 30 дена. Најважно е дека се препорачува Министерството за правда да изврши надзор над законитоста на примената на одредбите на Законот за здруженија и фондации, изјави Весна Бендевска, член на КСЗД.
„Иван Михајлов“ со актите извршил дискриминација на целокупното население, но препораката на комисијата не е извршна.
- Комисијата нема законски надлежности да затвора. Таа утврдува или не утврдува било каква форма на дискриминација. Во предметов утврдивме потешки форми на дискриминација од здружението во Битола. Комисијата утврди индиректна дискриминација од Министерството за правда, затоа што му овозможило со регистрацијата на ова здружение, да се вознемири поголема група граѓани. Комисијата е должна да предложи и препорача начин на отстранување, истакна Бендевска на прес-конференција.