КОМШИЌ ДО ВУЧИЌ: Aко се откажувате од Дејтонскиот договор, работите во БиХ поинаку ќе ги уредиме

Добивај вести на Viber

Повеќе партии од БиХ бараат да се суспендира Стратегијата на српскиот претседател, Александар Вучиќ затоа што сметаат дека носи ризици за регионот. 

Претседавачот со Претседателството на БиХ Жељко Комшиќ, вели дека усвојувањето на Стратегијата за одбрана и национална безбедност на Србија би значело нарушување на регионалниот мир и стабилност. 

Вели дека тоа би претставувало и вовед во нови тензии на просторот на Западен балкан, бидејќи тоа би бил акт на отворено непријателство кон државата Босна и Херцеговина. 

Тој оцени дека српскиот претседател Александар Вучиќ треба веднаш да ја суспендира Стратегијата, пред да биде доцна. Го потсети дека сè уште се свежи раните од последната српска агресија и спроведен геноцид, објави Фена.

„Ако во Србија мислат да се откажат од Дејтонскиот мировен договор, нека го кажат тоа – ќе ни биде задоволство работите во БиХ поинаку да ги уредиме“, изјави Комшиќ.

Toj потсети дека гаранти на Дејтонскиот договор се земји членки на НАТО. Комшиќ вели дека БиХ треба и ќе стане членка на НАТО, баш затоа што Србија има претензии кон нејзината територија. Вели дека тие брзо ќе дојдат на граница со Дрина за да ги спречат српските фантазии. 

Реагираше и социјал-либералната Наша странка (НС) од БиХ.

„Србија со својата Стратегија за одбрана повторно покажа територијални претензии кон БиХ. Зачувувањето на Република Српска им е национална цел, што е партикуларен и тенденциозен пристап кон БиХ, а ги подгрева и сепаратистичките намери во тој ентитет”, стои во реакцијата од НС.

Додаваат дека Србија, очигледно, не сфаќа дека со ваквите чекори токму таа најмногу влијае на зговарање за укинување на ентитетот Република Српска, бидејќи начинот на кој ја брани, импонира на оние сили кои би ја припоиле кон Србија. 

Повод за ваквите реакции е документот кој вчера го презентираше министерот за одбрана на Србија, Александар Вулин во Собранието. 

Во него се вели дека „чувањето на Република Српска како ентитет во БиХ е во склад со Дејтонскиот договор, и унапредување на положбата на Србите во регионот, и светот од посебно значење за безбедноста и одбраната во Република Србија“. Ова стои во Стратегијата за одбрана за 2020 година. 

Србите во БиХ се години наназад се противат на тоа БиХ да биде членка на НАТО.