Косово и Словачка прогласија вонредна состојба
Објавено во: Балкан 15 Март, 2020
Властите во Косово и Словачка прогласија вонредна состојба.
Премиерот Албин Курти го одобри барањето на Министерството за здравство да прогласи вонредна состојба на цела територија на Косово.
Преку одлука Курти објави дека сите институции на Владата на Република Косово треба да постапуваат во согласност со националниот план за одговор, а Министерството за здравство е одговорно за итно управување со јавното здравство.
Одлуката стапи на сила веднаш.
Ова следува откако беа потврдени уште четири нови случаи на коронавирус во Косово.
Министерот за здравство Арбен Витиа побара од премиерот на земјата, Албин Курти, да прогласи вонредна состојба.
Во Словачка е прогласена вонредна состојба поради епидемијата на коронавирус, изјави вечерва словачкиот премиер Петер Пелегрини.
Владата во Братислава наложи од утре затворање на сите продавници, освен оние за храна, аптеките, банките, бензиските станици и поштите.
Пелегрини истакна дека најверојатно фабриката на Фолксваген, кај Братислава, ќе го прекине производството на автомобилски делови утре или во следните денови.
Во Словачка се регистрирани 61 случај на заразени лица со коронавирус.
Вонредна состојба прогласи и соседна Србија.