Ковачев: Макрон не може да ги гарантира нашите интереси кон Македонија

Добивај вести на Viber

Бугарија не може да прифати како гаранција ниту една усна или писмена декларација. Гаранација од името претседателот на Франција, Емануел Макрон, или од име на претседателката на Европската комисија, Урсула фон дер Лајен, или кој било друг, не е гаранција.

Ова во интервју за БГНЕС го изјави европратеникот Андреј Ковачев, потпретседател на Европската народна партија.

Ковачев за БГНЕС ја коментираше претстојната посета на претседателот Румен Радев и премиерот Кирил Петков на Франција. Таму се очекува да го одобрат предлогот на претседателот Макрон за укинување на ветото за почеток на преговорите за членство на Македонија во ЕУ.

„Гаранција може да биде само доколку нашите точки од Рамковната позиција и Декларацијата на бугарскиот парламент, како и елементите на Договорот за пријателство и добрососедство бидат вклучени во преговарачката рамка што треба да ја усвојат сите земји-членки“, рече бугарскиот европратеник.

Ковачев истакна дека од страна на Скопје нема ни педа раздвижување за ниту една од темите кои се важни не само за Бугарија, туку според него, и поврзани со основните европски и човечки вредности.

„Фалсификувањето на историјата денес води кон дискриминација. Затоа немаме културно-историски спор со елитата на РСМ, туку проблеми поврзани со човековите права, дискриминација, што е последица на фалсификување и едукација која води до дискриминација“, рече европратеникот.

Тој додаде дека Бугарија има консолидирана позиција за почеток на преговорите на Македонија со ЕУ, која не е ограничена само на владејачката партија.

„Нашиот став е точките што ги предложивме да се вклучат во преговарачката рамка за пристапување на РСМ, што треба да биде прифатено од сите земји-членки во советот. Ако претседателот Макрон има нешто ново да и каже на Бугарија, треба да знаеме. Но, во никој случај не треба да се согласуваме ако некој уфрли нешто однадвор и рече - извинете се јавувам да ви го дадам тоа што треба да го прифатите“, рече европратеникот.