Лавров: Во Македонија опасно, Црна Гора ги жртвува односите со Русија
Објавено во: Балкан 23 Март, 2017
Министерот за надворешни работи на Русија Сергеј Лавров ги предупреди западните медиуми на опасност од заострување на ситуацијата во Македонија и изразил жалење поради Црна Гора која, како вели, попуштила пред ултиматумот-или Русија или НАТО.
„Во Македонија моментално е исклучително сложена состојбата, можеме дури и да ја наречеме своевидна криза, која е вештачки предизвикана и води кон општетствена поделба“, рекол Лавров и изразил надеж дека „западот ја разбира опасноста од таа ситуација“.
Говорејќи за Црна Гора , Лавров рекол дека жали што таа земја решила да влезе во НАТО.
„Црна Гора попуштила пред ултиматумот-или Русија или НАТО. Таа се одлучила да го занемари економскиот аспект и да ги жртвува односите со Русија. Нека е таа одлука на совест на црногорските лидери како и на раководителите на НАТО. Меѓутоа, апсолутно несфатливо е како членството на Црна Гора ќе ја зголеми безбедноста во НАТО“, додал тој.
Лавров се осврнал и на проблематиката на целокупниот балкански регион, посебно кога се работи за наводни провокативни дејствија на Русија, велејќи дека „сите нормални врски на балканските земји со Русија во ист час стануваат грижа на поедини претставници кои тоа го коментираат како мешање на Русија во внатрешните прашања на Балканот“.
„Ние не се плашиме од такви изјави, нашите ставови се покопуваат со ставовите на многу земји од Балканот“, рекол Лавров.